Arquivo | Convocatorias nosas RSS feed for this section

recitandocelsoemilio. Bótalle un ollo a algúns dos traballos doutros centros

12 Dec

recitandocelsoemilio, hoxe e sempre…

      Faltan poucas horas para as 12:00 do 12/12/12, pero na páxina da CGEDNL xa están algunhas mostras dos traballos realizados en moitos centros de Galiza para homenaxear ao escritor celanovés. Míraos, son todos excelentes. Nós…seguimos traballando 😉

http://coordinadoraendl.org/recitandocelsoemilio/index.php

Deitado frente ao mar. Celso Emilio Ferreiro na nosa voz

9 Dec

IMG_0859

Deitado frente ao mar

Lingua proletaria do meu pobo,

eu fáloa porque si, porque me gosta,

porque me peta e quero e dáme a gana;

porque me sai de dentro, alá do fondo

dunha tristura aceda que me abrangue

ao ver tantos patufos desleigados,

pequenos mequetrefes sen raíces

que ao pór a garabata xa non saben

afirmarse no amor dos devanceiros,

falar a fala nai,

a fala dos avós que temos mortos,

e ser, co rostro erguido,

mariñeiros, labregos da linguaxe,

remo i arado, proa e rella sempre.

Eu fáloa porque si, porque me gosta

e quero estar cos meus, coa xente miña,

perto dos homes bos que sofren longo

unha historia contada noutra lingua.

Non falo pra os soberbios,

non falo pra os ruíns e poderosos,

non falo pra os finchados,

non falo pra os baleiros,

non falo pra os estúpidos,

que falo pra os que aguantan rexamente

mentiras e inxustizas decotío;

pra os que súan e choran

un pranto cotidián de bolboretas,

de lume e vento sobre os ollos núos.

Eu non podo arredar as miñas verbas

de tódolos que sofren neste mundo.

E ti vives no mundo, terra miña,

berce da miña estirpe,

Galicia, doce mágoa das Españas,

deitada rente ao mar, ise camiño…

          Mércores, 12-12-12. Ligazóns que nos interesan:

http://coordinadoraendl.org/recitandocelsoemilio/celso.php

http://celsoemilioferreiro.org/

http://bvg.udc.es/ficha_autor.jsp?id=CelFerre&alias=Celso+Emilio+Ferreiro

http://www.realacademiagalega.org/figuras-homenaxeadas/-/journal_content/56_INSTANCE_8klA/10157/18163

http://sondepoetas.blogspot.com.es/2009/05/deitado-frente-ao-mar-celso-emilio.html

http://gavieira.blogspot.com.es/2012/03/deitado-frente-ao-mar-on-photopeach.html

http://www.crtvg.es/crtvg/arquivo/categoria/celso-emilio-ferreiro

http://www.edu.xunta.es/web/sites/web/files/content_type/news/2012/03/05/dossier_programa_ano_cef.pdf

https://sites.google.com/site/poemascelsoemilioferreiro/home

http://armandorequeixo.blogaliza.org/2012/01/04/celso-emilio-ferreiro-visto-por-xose-diaz-jacome-un-texto-inedito/

http://praza.com/cultura/2446/lllonga-noite-de-pedrar-non-encaixou-con-parte-do-establishment-galego-da-epocar/

http://www.ivoox.com/poesia-poetas-celso-emilio-ferreiro-audios-mp3_rf_1418436_1.html

http://www.aelg.org/resources/didacticspace/units/didactic22/DW_didactic22_1.pdf

recitandocelsoemilio. Xa queda menos

9 Dec

 

cartaz_recitando_celso_emilio

Martes 27 de novembro: II Xornadas das Ciencias

21 Nov

XORNADAS DAS CIENCIAS: Discurshow. Xurxo Mariño e Vicente de Souza

   Se hai unhas semanas boa parte do alumnado do noso centro tivo a oportunidade de compartir unha singular experiencia a través das oito sesións que os técnicos de Ceo Aberto levaron a cabo no Salón de Actos, este martes, día 27 de novembro, ese mesmo alumnado vai poder participar na segunda parte destas xornadas.

    Nesta ocasión, o actor Vicente de Souza e Xurxo Mariño achegarán o noso alumnado ao fascinante e incrible mundo dos protóns co seu Discurshow. A xornada terá lugar no a partir das 16:30 horas no auditorio da A. C. Rosalía de Castro, hora en que comeza a representación. A actividade, que contou cunha moi boa recepción na súa primeira xornada, está organizada pola Anpa do IES Cacheiras e a Vicedirección, xunto cos departamentos de Ciencias e de Física e Química, e está patrocinada polo Concello de Teo, activo colaborador das actividades que se propoñen desde o centro, ademais de organizador de xornadas de música, teatro etc.

    Só esperamos que a través desta representación teatral, o noso alumnado aprenda dunha maneira lúdica e entretida. Xa nos contarán! Polo de agora, deixámosvos aquí algunhas ligazóns:

Ceo Aberto

Discurshow

Un ano máis, celebrouse o Samaín no instituto

5 Nov

   O pasado mércores (31/10/12), os grupos de 1º e 2º da ESO participaron moi activamente no festexo do Samaín. Como se fixera xa o ano pasado, logo de convocar os delegados de todos os grupos e de distribuír a información correspondente aos titores, a celebración foi todo un éxito.

   Inscribíronse os cinco grupos de 1º da ESO e seis de 2º -ao participar por separado dos grupos de referencia o alumnado do Agrupamento 2ºA+B. É dicir, participaron no concurso de cabazas e na decoración das aulas cerca de 300 alumnos. Houbo disfraces, houbo música, houbo candeas e cabazas; pero ademais houbo moita creatividade. moita imaxinación e colaboración entre os participantes.

    A partir do segundo recreo, o alumnado participante acababa de decorar as aulas, ou disfrazábase, ou ensaiaba as coreografías/ dramatizacións pensadas para a ocasión. Logo, contra as 13:40 h., o xurado – composto por tres alumnas integrantes do EDNL (Helena, Xiana e Thais), dúas profesoras (Puri e Ánxeles) e unha representante do persoal non docente (María)- foi pasando por todas as aulas e gozando das improvisacións que o alumnado levaba a cabo.

    O tempo foi xusto para que o xurado emiritira o seu fallo e para que entre todos, alumnado e profesorado, recolleran as aulas deixando todo como estaba ao principio. Algunhas cabazas quedaron no centro (verédelas nas fotos), pero outras foron para as casas de cadaquén… a esperar polas ánimas.

     Ah!, o fallo do xurado foi o seguinte:

1º PREMIO: 1º ESO C e 2º ESO D

2º PREMIO: 2º ESO C

    Noraboa a todos os participantes, non só aos gañadores. Agora só queda esperar polos premios: SORPRESA!!!!!!!!!

Se queres botar un ollo ao traballo dos participantes, aquí tes unha galería de fotos:

O pase de diapositivas require JavaScript.

Pandeireteiras no IES Cacheiras

8 Out

    Comezamos un novo curso académico e isto pinta moi ben. Cando o ano pasado botamos a andar e a traballar conxuntamente coa Vicedirección do centro, falamos moitas veces de conseguir formar pequenos grupos co alumnado que ten estudos musicais e que xa forma parte de asociacións fóra do instituto. Pois ben, este ano xa temos a punto de se poñer mans ao traballo un grupo de pandereteiras (Jéssica, Rocío, Xiana e Thais, de 4º da ESO; Sabela e Noelia, de 1º de bacharelato; e Helena, Paula, Branca e Fani, de 2º de bacharelato). Esperamos podelas oír e acompañar o próximo mes de novembro, cando amenicen o noso magosto. Daquela subiremos algúns vídeos e fotos; polo de agora agradecémoslles o seu interese, a súa colaboración e as ganas que demostraron esta mañá durante a primeira reunión.

    Isto dános forza e ánimos para seguir ampliando as nosas miras: xa temos un trompetista e un gaiteiro (Miguel e Rubén, de 3º da ESO), agora gustaríanos ampliar o grupo e conseguir reunir un nutrido número de músicos que nos axuden a formar unha pequena banda do instituto. Deste xeito, entre as pandereteiras e a banda poderemos difundir e valorar o noso patrimonio musical tradicional e aproveitar os talentos do noso alumnado. Imos por bo camiño e con estas rapazas e estes rapaces habémolo facer con bo ritmo e boa música nosa.

Palabras tecen redes. 1º Festival de Poesía do IES Cacheiras

13 Abr

1º FESTIVAL DE POESÍA DO IES CACHEIRAS

PALABRAS TECEN  REDES

Cacheiras 17 de abril 2012

Salón De Actos Do IES. De 16.30 a 18.00 horas

PROXECCION DE VIDEOPOEMAS A escuras de María Rosendo, Todas as mulleres que fun, Andrea Nunes

ANDREA NUNES

Todas As Mulleres Que Fun, Roubáronnos Os Ollos, Pensar Que Estiven Perdida, Non Todas Preferimos O Paxaro Na Man Do Libro Todas As Mulleres Que Fun

 ANA ROMANÍ

Camiñan Descalzas Polas Rochas, Do Libro Das Últimas Mareas, Xunto Á Tarde Hai Algo Que Salta, Do Libro Arden, Eu Vinas Reventar As Pontes, Do Libro Estremas

MARÍA ROSENDO

Oito Baldosas Empoadas, O Silencio Guindounos Pola Gorxa, Lembraste De Cando Subíamos Aos Taxis Amarelos Do Libro Nómade

PROXECCIÓN VIDEOPOEMA E AGORA TI

CLARA ASPERILLA 2º BAC   Andan Descalzas Pola Pedra Fría

YASMINA M. FRAGA 1º ESO  Poema Da Muller Soñadora

GADEA GONZÁLEZ 2º BAC  A Princesa Que Agardaba

MARÍA MARCOS 2º BAC      De Novo Esa Fermosa Paisaxe

J.CARLOS MARIÑO 2º BAC  Versículos Do Xénese

JOSÉ LUÍS RUANOVA 1º ESO  Guerreiras Do Noso Tempo

MARI LUZ BUENO AGRASAR 2º ESO   Tristeza

SARA ROMERO CASAL 1º ESO     Se Non Fose Por Ti

CREACIÓN MUSICAL: SANDRA GALERA 2º BAC

INTERPRETACIÓN MUSICAL: SANDRA GALERA  (2º BAC) HELENA MARTÍNEZ (2º BAC) ADRIANA  CANICOVA (2º BAC) PABLO FERNÁNDEZ (2º ESO) IAGO TORRES (2º ESO)

CREACIÓN ARTÍSTICA, IMAXES, FOTOS: ALUMNADO DE 3º e 4º ESO

FIN DE ACTO: Concerto LEO ARREMECÁGHONA

ORGANIZA: DEPARTAMENTOS LINGUA E LITERATURA, DEBUXO, MÚSICA, eNL E VICEDIRECCIÓN

 COLABORA ANPA

Recreos de cinema pasa a proxección dos Spots Sociais para o xoves 22

21 Mar

 Será o xoves, no primeiro recreo, cando Alberto Quintela e Agustín presenten as curtas Spots Sociais, “feitos polos alumnos de Cultura Audiovisual como exercicio de creación unha vez estudadas e analizadas as estratexias que utiliza a publicidade para manipular os nosos comportamentos e hábitos de consumo.”

   Como podedes ler na páxina de aturuxofilms “Pareceunos interesante aplicar estas estratexias ao ámbito da educación en valores e neste caso promovendo o coidado do noso medio ambiente e a igualdade de xénero no traballo.” Nós engadimos a ese interesante, necesario; por iso vos convidamos a asistir e participar nesta iniciativa posta en marcha este mes: os Recreos de Cinema.

   Agardamos e agradecemos a vosa presenza e participación xa que sen vós nada disto sería posible (nin as curtas nin a actividade). Aproveitamos para vos adiantar que o mércores 28 de marzo se vai estrear a curta titulada A moza tecelá e que para a estrea van estar: Carolina, Helena, Xoel e Laura. Ata daquela ;=D

http://aturuxofilms.wordpress.com/2012/03/19/spots-sociais-nos-recreos-de-cine/

Sés no IES

21 Mar

  Este martes pola tarde, o instituto tivo unha xornada diferente que engaiolou ao noso alumnado: Sés, María Xosé Silvar, encheu o salón de actos.

   Aínda non eran as tres e media da tarde cando chegaron Sés e mais para montar todo no salón de actos e ensaiar. O concerto empezaría ás 17’00 e durante unha hora e pico 150 dos nosos alumnos estarían gozando dun bo concerto. Mentres preparaban todo, estivemos de parola: falamos de música galega e de compromiso, da súa traxectoria e de que era a primeira vez que ían tocar nun centro de ensino, de que hai poucas rockeiras na música galega… Foi un gustazo!

   Eu deixeinos alí, quentando motores, e volvín velos cando xa rematara todo e marchaban. Sés estaba moi satisfeita e o alumnado, encantado (aínda que as présas dos autobuses propiciaron unha saída precipitada do concerto). Falamos outro anaco: de que todo correra ben, de que Sheila se emocionara moito cando Sés a felicitou pola convocatoria da porteira do Cacheiras para a Selección (ver entrada antiga: Sheila Fernández Suárez) e de que era moi gratificante pensar que durante e despois do concerto unha parte do auditorio dixerise e aproveitase da música desta cantante tan singular.

   Onte, xa no recreo, varias das asistentes ao concerto quixeron saber como contactar coa cantante e como seguir o que fai; en fin, obxectivo cumprido! Houbo empatía e Sés chegou máis do que seguramente imaxinou. Sei que Noelia, Antía, Sheila … non lle van perder o paso a esta artista e agora teñen unha referencia musical coa que ata o martes non contaban (ao lles dicir que xa tocara na Ramallosa o día d’Os Tixolas …“ai, que pena! Non sabiamos e non fomos”).

   Até pronto, Sés, e bos concertos nos próximos centros de ensino.

http://www.mariaxosesilvar.com/ses-nos-centros-de-ensino/

http://www.youtube.com/seudeela

Temos lemas. Conciencia de lingua, esforzo e traballo

26 Feb

DO IES CACHEIRAS CURSO 2011-2012

     Van pasando os días e as semanas e vai chegar o momento de retirar a exposición dos traballos que realizou o alumnado de 1º e 3º da ESO con Montse Amigo. Nesta ocasión, o eixe temático era Crear un lema que reflectira a necesidade de fomentar a lingua de noso.

    O resultado foi verdadeiramente magnífico e nós decidimos sacalo ao corredor central do centro e expoñer os traballos -cerca de 30- e logo realizar un concurso. Dúas semanas despois de estaren expostas as obras, un xurado composto por alumnado e profesorado -Helena (2º Bach.) e Manu (1º ESO), Dolores (Dpto. Xeografía e Historia, profesora de Historia da arte) e eu mesma (María Pardo), en representación do EDNL- escolleu CINCO delas como as mellores. Foi complicado porque como veredes os traballos son moi bos.

   Polo de agora, imos subir todas as fotografías que temos da exposición (aínda falta algunha, porque non ten a calidade que debera) para que se visibilicen aínda máis. Ese é o noso desexo: que o traballo do IES Cacheiras poida ser visto fóra das nosas aulas e dos nosos espazos de exposición. Esperamos que gocedes botándolles unha ollada ;=)

O pase de diapositivas require JavaScript.

Exposicións no centro II. Montaxes sobre tanxencias e sobre percepción

4 Feb

   Traballos realizados polo alumnado de 4º da ESO e de 1º de Bacharelato. Tanxencias (baseadas na obra de Maruja Mallo) e percepcións. De novo, moitos parabéns!!

   Para verdes con máis detalle: 

O pase de diapositivas require JavaScript.

II Concurso de Poesía IES Cacheiras

4 Feb
Bases

1.- Pode participar todo o alumnado do IES, con unha ou máis composicións poéticas.

2.- As obras estarán escritas en lingua galega e terán unha temática e extensión libres.

3.- Ao final da(s) composición(s) aparecerán:

– nome

– apelidos

– curso/ grupo

   Tamén se poderá(n) asinar a(s) obra(s) cun pseudónimo, pero nese caso indicaranse os datos anterirores nun sobre á parte.

3.- Prazo de entrega. Remata o 17 de febreiro de 2012.

4.- As obras presentadas ao concurso serán entregadas ao profesorado responsábel da actividade:  no departamento de Lingua Galega ou na Vicedirección.

5.- As composicións gañadoras serán publicadas na revista do centro A Eira dos Mouros e recibirán un agasallo sorpresa.

Entroido no IES de Cacheiras: convocatorias

28 Xan

  Xa vai acabar xaneiro e entramos no mes do entroido. Estamos nunha bisbarra na que esta festa está ben arraigada e o noso centro non perdeu ano para celebrala por todo o alto. Este ano non vai ser diferente. Adiantámosvos o que imos ter (xa se trataron estes temas na xunta de delegad@s convocada a semana pasada):

– Performances e disfraces nas aulas.

– Festival.

– Música en directo.

  Pero ademais, este ano queremos medrar e organizar, desde xa, máis actividades nas que toda a comunidade poderá participar (iso esperamos!), gozar e divertirse.

Non te atranques. Recolleita por escrito de atranques dos anos anteriores (empezando no ano que se queira) e elaboración dun mural que estará exposto no instituto.

a.- O alumnado que se apunte, recollerá polo menos un atranque (con data, sempre que sexa posible) e mandarao ao correo mpfernandez@edu.xunta.es ou entregarao ás integrantes do EDNL e da Vicedirección (Sabela, Inés, Puri, María). Estaría moi ben conseguirmos un atranque por aula!

b.- Entre o alumnado participante e nosoutras, elaboraremos un xeitoso mural que se expoñerá no centro desde antes das festas de Entroido ata primeiros de marzo.

c.- Mentres, unhas cantas parellas, formadas polo alumnado que se anote, prepararán os seus atranques para faceren unha mostra no Salón de Actos do centro o venres antes da ponte de entroido (formando parte do festival).

d.- Sendo moi ambiciosas e contando unha vez máis coa participación do alumnado, intentaremos contar coa presenza no instituto dun Xeneral e un Correo que, dacabalo, adianten algo do repertorio deste ano. 

Nun futuro, parte dese material será empregado desde o EDNL para a elaboración dun almanaque que faremos para o vindeiro curso (12-13) e que servirá para poñer á venda e poder ir financiando actividades que se vaian propoñendo.

Así se disfrazaron… me disfracei. Como se disfrazaron as avoas e os avós, as nais e os pais ou o noso alumnado hai anos?  Selección e organización de fotos traídas polo alumnado do centro para, tamén, facermos un divertido e vistoso mural.

a.- Tamén neste caso, o alumnado que se apunte debe aportar unha ou máis fotos de familiares da casa disfrazados para o entroido que fora (coa nao, sempre que poida saberse).

b.- Se as fotos están dixitalizadas, mándanse ao correo que indicamos anteriormente; se se poden traer as orixinais ao centro, comprometémonos a coidalas e preservalas de calquera estrago. Neste caso, entregaranse ás integrantes da Vicedirección e do EDNL.

c.- Preferiranse fotos de anos anteriores á chegada do alumnado ao centro (da gardería, do colexio, coas amizades fóra do centro…)

d.- Segundo o material aportado, crearíanse varias modalidades: avoas-avós, nais-pais, alumnas-alumnos. Xa ordenadas, elaborarase outro mural que permanecerá exposto no centro durante un mes.

Como no caso anterior, nun futuro, parte dese material será empregado desde o EDNL para ilustrar o almanaque do vindeiro curso (12-13).

Receitas de Entroido (cousiñas ricas…) e telderetes de venda de filloas, orellas, flores… (…cousiñas de comer)Recolleita de receitas das lambetadas máis típicas do Entroido en Teo e mais daqueles pratos que se comen antes da chegada da primavera, pero sobre todo cadrando co entroido.

O alumnado que queira participar, pode facelo de dúas maneiras:

a.- traendo só a receita escrita  (alumnado de 1º, 2º, 3º da ESO e mais 1º e 2º de Bacharelato) 

b.- traendo a receita escrita e mais unha cantidade de orellas, filloas, flores… (4º da ESO) para venderen no instituto.

Neste segundo caso, a Vicedirección e o EDNL poñerán todo da súa parte para montar no centro uns telderetes onde toda a comunidade educativa poida colaborar co alumnado de 4º da ESO, comprando o que desexe e saboreando bos peperetes.

As receitas expoñeranse, coma en outono, na Cafetaría e gardaranse para ser publicadas na revista do centro, A Eira dos Mouros, xunto coas que nos quedan por pedir.

  Ben. Xa vedes, só necesitamos colaboración. Para conseguila, o Xefe de Estudos xa convocou a xunta de delegad@s para este luns, día 30 de xaneiro. Lembrádevos de asistir! Sen vós non podemos mellorar!!!

Lugar: aula de 1º Bacharelato A

Hora: 2º recreo

Sede puntuais, por favor. Un millón ;=)

25 de novembro. Ningunha violencia pode ser admitida; a machista, contra as mulleres, tampouco. Hoxe estaremos no CSC da Ramallosa. Vémonos alí.

24 Nov

   Aquí queda a info que encontraredes na páxina do Concello de Teo. Apoiemos estas iniciativas e agradezamos o traballo e a colaboración de quen participou e fixo posible a intervención poética e musical “A moza tecelá“,  texto de Marina Colasanti adaptado por Sabela Álvarez, profesora do departamento de Lingua galega e literatura do centro.

   Se queres ver algunhas imaxes da preparación da escenografía e dos ensaios da peza, mira aquí:

O pase de diapositivas require JavaScript.

AXENDA

Lectura da declaración institucional en conmemoración do 25 de novembro 24 de novembro de 2011

   Os actos en conmemoración do 25 de novembro comezarán coa lectura da Declaración institucional diante da Casa do Concello a partir das 18:00 horas. A continuación gardarase un minuto de silencio polas vítimas da violencia de xénero. Depois no CSC da Ramallosa membros da asociación Aspamite representarán unha obra de teatro e o alumnado do IES de Cacheiras farán unha lectura de textos acompañados de música. Máis información premendo aquí »

E tamén temos un vídeo, realizado polo propio alumnado, onde se pode ver que fixeron e como o pasaron xuntos.

24 Nov

Por fin!!!!! Xa podedes ver o vídeo que fixeron os nosos creadores. Non deixedes de velo ;=)

Pincha aquí para velo: SAMAÍN